Telegram Ads’da reklama qilayotganda TOP-5 xato va ularni qanday tuzatish mumkin

Muammo: Ko‘plab reklamachilar kampaniya start olishi bilan darrov o‘zgartirish kiritishni xohlashadi — CPM stavkasini almashtirish, kreativni yangilash yoki matnni qayta yozish. Lekin har bir jiddiy o‘zgarish algoritmni qayta “o‘rganishga” majbur qiladi. Ya’ni tizim oldin to‘plangan ma’lumotlarni bekor qilib, optimallashtirishni boshidan boshlaydi. Natijada ko‘rsatkichlar “sakrab” qoladi, byudjet esa ortiqcha sarflanadi.

Yechim: Shoshilmang va kampaniya ishga tushgan zahoti impulsiv o‘zgarishlar kiritmang. Bitta gipotezaga e’tibor qarating va reklama kamida 2–3 kun hech qanday o‘zgartirishsiz ishlashiga ruxsat bering. Shu vaqt ichida tizim yetarli statistikani yig‘ib, optimallashtirishni boshlaydi. Shundan keyin natijalarni tahlil qilib, kerak bo‘lsa tuzatishlar kiriting.

👉 Digital-reklamada sabr har doim foyda keltiradi. Tez-tez “o'zgartirish” esa tizimni chalkashtiradi va natijalarni xira qiladi.

Muammo: Ko‘plab targetologlar hanuzgacha faqat UTM-belgilar va tashqi analitikaga tayanyapti. Natijada, siz faqat “Telegram’dan kelgan” arizalarni ko‘rasiz, lekin aynan qaysi kampaniya yoki qaysi e’londan lead tushganini bilolmaysiz. Qaysi kreativ konversiya berayotganini, qaysisi esa shunchaki trafik to‘playotganini ajratish qiyin. Telegram Pixel’siz reklam kabinetingiz faqat klik va ko‘rsatishlarni ko‘rsatadi, ammo foydalanuvchi klikdan keyin nima qilganini bog‘lay olmaydi. Shu sababli siz samarasiz reklamaga byudjet yo‘qotishingiz mumkin.

Yechim: Rasmiy Telegram Pixel Tag’ni o‘rnating va saytga kerakli hodisalarni (konversiyalarni) bog‘lang. 2025-yil may oyidan Telegram pixelni ishga tushirdi — bu kichkina kod bo‘lib, saytingizga joylashtiriladi va foydalanuvchi harakatlarini to‘g‘ridan-to‘g‘ri reklama kabinetiga uzatadi.
Pixel orqali siz skvoznoy analitikaga ega bo‘lasiz: kim bosganini, bosgandan keyin saytida nima qilganini va eng asosiysi — qaysi reklama konversiya olib kelganini ko‘rasiz. Telegram Ads interfeysida bu ma’lumotlar CPA (bir konversiya narxi) ko‘rinishida chiqadi.

👉 Natijada siz har bir kampaniya qancha lead olib kelganini va har bir lead qancha turganini aniq bilasiz. Pixel Telegram Ads’ni to‘laqonli performance-kanalga aylantiradi: forma to‘ldirish, ro‘yxatdan o‘tish, xarid va boshqa maqsadlarni kuzatib, kampaniyalarni shu natijalarga optimallashtirishingiz yoki saytingiz bilan allaqachon o‘zaro ta’sir qilganlarga remarketing qilishingiz mumkin.

Muammo: Ba’zi reklamachilar auditoriyasiga yoki kreativiga shunchalik ishonadiki, darrov juda yuqori CPM (mingta ko‘rsatish narxi) qo‘yishadi — go‘yoki tezroq hammani qamrab olaman deb. Lekin agar kampaniya “ishlamasa”, byudjetning katta qismi atigi bir necha soatda yonib ketadi. Yana bir muammo: yuqori stavka samaradorlikni kafolatlamaydi — shunchaki ko‘rsatish uchun ortiqcha pul to‘laysiz, ammo proporsional natija olmaysiz. Ko‘pincha yangi boshlovchilar tasodifiy yuqori stavka qo‘yib, keyin reklama nima uchun o‘zini oqlamaganini yoki umuman to‘g‘ri ishlamaganini tushunmay qolishadi.


Yechim: Avval minimal stavkadan boshlang va katta byudjet kiritishdan oldin kichik miqyosda kampaniyani sinab ko‘ring. Mutaxassislar startda eng past CPM qo‘yishni maslahat berishadi. Shu tarzda auditoriyaning reaksiyasini ko‘rasiz: CTR qanday, konversiyalar bormi. Agar natijalar yaxshi bo‘lsa — CPM’ni asta-sekin oshirib, qamrovni kengaytiring. Muhimi — buni bosqichma-bosqich qilish, ortiqcha ko‘rsatishlar uchun keraksiz pul sarflamaslik.

👉 Oddiy qilib aytganda: avval gipotezani “kichik xarajat” bilan tekshirib ko‘ring, e’lon ishlashiga ishonch hosil qiling, keyin esa katta byudjetga o‘ting. Bu pulni havoga sovurishdan saqlaydi.

Muammo: Ba’zi reklamachilar chiroyli banner yasab yoki “zo‘r” deb o‘ylagan matn yozib, faqat bitta e’lon bilan cheklanib qolishadi. Lekin eng yaxshi deb hisoblagan kreativ ham ishlamasligi mumkin — auditoriyaning reaksiyasini 100% oldindan bilib bo‘lmaydi. Natijada faqat bitta e’lonni ishga tushirib, kutilgan natija bo‘lmasa, “platforma ishlamaydi” degan xulosaga kelish oson. Aslida esa shunchaki xabar yoki taklifni topa olmagansiz. Bundan tashqari, ba’zilar faqat bitta formatda (masalan, faqat kanallar lentasida) reklama berishadi va boshqa joylashuvlarni sinab ko‘rishmaydi. Natijada auditoriyaning bir qismini yo‘qotasiz: ehtimol sizning maqsadli auditoriyangiz bannerlarni ko‘proq storiesda yoki reklama chat-botlarda ko‘rishi mumkin, lekin sinab ko‘rmasangiz, bilib bo‘lmaydi.

Yechim: Har doim bir nechta kreativ va formatni parallel test qiling. Barcha tuxumni bitta savatga qo‘ymang. Optimal variant — bir vaqtning o‘zida 5–7 ta e’lon ishga tushirish, sarlavha, rasm, matn va CTA’larni turlicha qilib. Telegram Ads’da ham turli formatlarni sinash kerak: faqat matnli e’lonlar bilan cheklanmay, video/story bannerlari, qidiruv natijalaridagi reklama va bot ichidagi e’lonlarni ham test qiling. 2024-yil oxiridan boshlab Telegram yangi joylashuvlarni ochdi: banner va videoroliklar qo‘shildi, 2025-yilda esa botlarda va qidiruv satrida reklama paydo bo‘ldi. Agar auditoriyangiz shu joylarda faol bo‘lsa, natija ancha yuqori bo‘lishi mumkin.

👉 Bir nechta kreativni parallel ravishda ishga tushirish sizga qaysi biri yaxshiroq ishlashini ko‘rsatadi. CTR past bo‘lgan variantlarni (masalan, ~0,5% dan past) darhol o‘chirib tashlang. Shu orqali eng yaxshi reklama va joylashuv kombinatsiyasini topasiz, byudjetni esa samarasiz variantlarga sovurib qo‘ymaysiz. G‘oliblarni kengaytiring, yutqazganlarni esa yangilari bilan almashtiring.

Muammo: Chiroyli raqamlarni ko‘rib, faqat bitta ko‘rsatkichga qaram holda kampaniyani “muvaffaqiyatli” yoki “muvaffaqiyatsiz” deb hisoblash oson. Eng ko‘p uchraydigan holat — yuqori CTR yoki arzon klikdan xursand bo‘lish. Ha, CTR 2–3% bo‘lishi va klik arzon tushishi mumkin, lekin agar lead narxi (CPA) osmonni qoqsa, bunday kampaniyani samarali deb bo‘lmaydi.
Aksincha ham bo‘ladi: CPM past (ya’ni ko‘rsatishlar arzon), lekin auditoriya lead’ga aylanmaydi. Faqat “voronka”ning bitta bosqichiga qarab baho berish kampaniyaning umumiy holatini ko‘rmaslikka olib keladi. Natijada muammolarni juda kech payqaysiz, byudjet esa allaqachon havoga uchib bo‘ladi.

Yechim: Voronkani boshidan oxirigacha kuzating — ko‘rsatishdan konversiyagacha. Har bir asosiy metrikaning natijalarini va ular o‘zaro qanday bog‘liqligini tahlil qiling.
Telegram Ads’da butun zanjirni nazorat qiling:

• CPM → ko‘rsatishlar uchun ortiqcha to‘lamayapsizmi?
• CTR → kreativ yetarlicha e’tibor tortayaptimi?
• CPC → bir klik sizning sohangiz uchun maqbul narxda tushayaptimi?
• CPA → bir lead yoki obunachini jalb qilish qancha turayapti?

Faqat kompleks tahlil haqiqatni ko‘rsatadi. Masalan:

• Agar CTR yuqori, lekin lead qimmat bo‘lsa — muammo taklifda yoki landing sahifada. Foydalanuvchilar bosishyapti, lekin konversiya qilmayapti.
• Agar CTR past bo‘lsa — demak, kreativ yoki xabar auditoriyani qiziqtirmayapti.

Shuningdek, lead sifati bo‘yicha qo‘shimcha ko‘rsatkichlarni ham kuzating: yangi obunachilardan qanchasi bir haftadan keyin faol qolmoqda, qanchasi darrov chiqib ketmoqda. Bu ham lead qiymatini baholashda muhim.

👉 Birgina chiroyli metrikaga ishonib qolmang. Asosiy natijaga qarang: ariza, obuna yoki sotuv. Foydalanuvchi yo‘lida qayerda “teshik” borligini aniqlang va kuchingizni o‘sha joyni yaxshilashga sarflang. Shunda haqiqiy natijaga erishasiz.